ਜਦੋਂ 4 ਜੂਨ ਐਤਵਾਰ ਵਾਲੇ ਦਿਨ 40 ਮੁਕਤਿਆਂ ਦੀ ਪਵਿੱਤਰ ਯਾਦ ਵਿਚ ਬਣੇ ਜ਼ਿਲ੍ਹਾ ਮੁਕਤਸਰ ਦੇ ਇੱਕ ਪਿੰਡ ਦੌਲਾ ਵਿੱਚ ਇੱਕ ਅਕਾਲੀ ਸਰਪੰਚ ਆਪਣਾ ਜਾਇਜ਼ ਹੱਕ ਮੰਗ ਰਹੀ ਇੱਕ ਅਧਿਆਪਕ ਬੀਬੀ ਵਰਿੰਦਰਪਾਲ ਕੌਰ ਨੂੰ ਬਾਰ ਬਾਰ ਵਾਲਾਂ ਤੋਂ ਪੁੱਟ ਰਿਹਾ ਸੀ ਅਤੇ ਉਸ ਨੂੰ ਬਿਨਾਂ ਰੁਕੇ ਚਪੇੜਾਂ ਮਾਰ ਰਿਹਾ ਸੀ ਤਾਂ ਤੁਸੀਂ ਹੀ ਦੱਸੋ ਕਿ ਇਸ ਕੁਲੱਛਣੀ, ਨੀਚ ਤੇ ਬਦਨਾਮ ਘਟਨਾ ਨੂੰ ਕੀ ਨਾਂਅ ਦੇਣਾ ਚਾਹੋਗੇ ? ਸ਼ਰਮਨਾਮ ਕਾਂਡ ? ਜਾਂ ਅਦਾਲੀ ਦਲ ਦੇ ਸ਼ਾਨਾਮੱਤੇ ਇਤਿਹਾਸ ਉਤੇ ਕਾਲਾ ਧੱਬਾ ? ਜਾਂ ਅੱਜ ਦੀ ਅਕਾਲੀ ਲੀਡਰਸ਼ਿਪ ਲਈ ਡੁੱਬ ਕੇ ਮਰ ਜਾਣ ਦੀ ਸਿਫਾਰਸ਼ ? ਜਾਂ ਸਿੱਖ ਕੌਮ ਲਈ ਬੁਰੇ ਦਿਨਾਂ ਦਾ ਦੌਰ ?ਜੇ ਸਿੱਖ ਕੌਮ ਆਪਣੇ ਰੂਹਾਨੀ ਸੋਮਿਆਂ ਨਾਲੋਂ ਅਜੇ ਪੂਰੀ ਤਰ੍ਹਾਂ ਟੁਟ ਨਹੀਂ ਗਈ ਅਤੇ ਜੇ ਇਸ ਕੌਮ ਦੇ ਨਿਰਮਲ ਅਤੇ ਕੋਮਲ ਜਜ਼ਬਿਆਂ ਵਿੱਚ ਔਰਤ ਪ੍ਰਤੀ ਪੂਰਾ ਪੂਰਾ ਸਤਿਕਾਰ ਕਾਇਮ ਰੱਖਣ ਬਾਰੇ ਗੁਰੂ ਨਾਨਕ ਸਾਹਿਬ ਦੀ ਹਦਾਇਤ ਅਤੇ ਸਾਡਾ ਇਤਿਹਾਸ ਥੋੜਾ ਬਹੁਤਾ ਵੀ ਅਸਰ ਰੱਖਦਾ ਹੈ ਤਾਂ ਸਾਡੀ ਕੌਮ ਨੂੰ ਆਪਣੀ ਤਮਾਸ਼ਬੀਨ ਚੁੱਪ ਤੋੜਨੀ ਚਾਹੀਦੀ ਹੈ ਅਤੇ ਨੀਚ ਹਰਕਤ ਕਰਨ ਵਾਲੇ ਅਤੇ ਸਿੱਖ ਅਖਵਾਉਂਦੇ ਅਕਾਲੀ ਸਰਪੰਚ ਨੂੰ ਕਰੜੀ ਤੋਂ ਕਰੜੀ ਸਜ਼ਾ ਦਿਵਾਉਣ ਲਈ ਅੱਗੇ ਆਉਣਾ ਚਾਹੀਦਾ ਹੈ।
ਇਕ ਹੋਰ ਜ਼ਰੂਰੀ ਗੱਲ। ਸਾਡੇ ਲਈ ਇਹ ਸੋਚਣ ਦਾ ਵੀ ਸਮਾਂ ਹੈ ਕਿ ਵਰਤਮਾਨ ਅਕਾਲੀ ਸਫ਼ਾਂ ਵਿੱਚ ਇਖਲਾਕੀ ਤੇ ਰੂਹਾਨੀ ਕਦਰਾਂ ਕੀਮਤਾਂ ਦਾ ਸੋਮਾ ਪੂਰੀ ਤਰ੍ਹਾਂ ਕਿਉਂ ਸੁਕਿਆ ਨਜ਼ਰ ਆ ਰਿਹਾ ਹੈ? ਇਸ ਉਤੇ ਪਤਝੜ੍ਹ ਦੀ ਰੁਤ ਆਉਣ ਪਿਛੇ ਅਸਲ ਕਾਰਨ ਕੀ ਹਨ? ਸੰਤਾਂ ਮਹਾਂ ਪੁਰਸ਼ਾਂ ਦੇ ਵਿਸ਼ਾਲ ਡੇਰਿਆਂ ਉਤੇ ਕੋਈ ਸੰਤ-ਸਿਪਾਹੀ ਨਜ਼ਰ ਕਿਉਂ ਨਹੀਂ ਆਉਂਦਾ ਜੋ ਉਨ੍ਹਾਂ ਸ਼ੋਕਰਿਆਂ ਦਾ ਬੁਥਾੜ ਭੱਨੇ ਜੋ ਸਿੱਖ ਭੇਸ ਵਿੱਚ ਗੁੰਡੇ ਬਣ ਕੇ ਅਕਾਲੀ ਦਲ (ਬਾਦਲ) ਵਿੱਚ ਸ਼ਾਮਲ ਹੋ ਰਹੇ ਹਨ ਅਤੇ ਜਿਨ੍ਹਾਂ ਨੂੰ ਮਨ-ਆਈਆਂ ਕਰਨ ਤੋਂ ਰੋਕਣ ਲਈ ਚੋਟੀ ਦੀ ਲੀਡਰਸ਼ਿਪ ਵੀ ਬੇਵੱਸ ਹੋਈ ਨਜ਼ਰ ਆ ਰਹੀ ਹੈ। ਇਸ ਘਟਨਾ ਨੂੰ ਇਤਾਫਕੀਆ ਜਾਂ ਅਚਾਨਕ ਵਾਪਰੀ ਘਟਨਾ ਹੀ ਨਹੀਂ ਕਹਿਣਾ ਚਾਹੀਦਾ ਸਗੋਂ ਇਸ ਤੋਂ ਪਹਿਲਾਂ ਵੀ ਲੁਧਿਆਣਾ ਸ਼ਹਿਰ ਵਿਚ ਇਕ ਤਹਿਸੀਲਦਾਰ ਨੂੰ ਬੁਰੀ ਤਰ੍ਹਾਂ ਕੁਟਣ ਵਾਲੇ ਅਤੇ ਉਸ ਦੀ ਪੱਗ ਲਾਹੁਣ ਵਾਲੇ ਬੰਦੇ ਵੀ ਸਥਾਨਕ ਅਕਾਲੀ ਆਗੂ ਹੀ ਸਨ। ਅਕਾਲੀ ਦਲ ਦੇ ਯੂਥ ਵਿੰਗ ਉਤੇ ਇਕ ਸਰਸਰੀ ਝਾਤ ਪਰ ਬਾਜ਼ ਨਿਗਾਹ ਹੀ ਤੁਹਾਨੂੰ ਦੱਸ ਦੇਵੇਗੀ ਕਿ ਇਨ੍ਹਾਂ ਦੇ ਚਿਹਰਿਆਂ ਉਤੇ ਨਾ ਹੀ ਸਿੱਖੀ ਦਾ ਕੋਈ ਰੰਗ ਹੈ, ਨਾ ਹੀ ਇਤਿਹਾਸ ਦੀ ਕੋਈ ਚਮਕ ਹੈ ਅਤੇ ਨਾ ਹੀ ਵੱਡੀਆਂ ਜ਼ਿੰਮੇਵਾਰੀਆਂ ਸਾਂਭਣ ਦਾ ਕੋਈ ਪਵਿੱਤਰ ਅਹਿਸਾਸ ਹੈ। ਜੇ ਇਹੋ ਜਿਹੇ ਨੌਜਵਾਨਾਂ ਨੇ ਹੀ ਕੱਲ੍ਹ ਨੂੰ ਅਕਾਲੀ ਦਲ ਦੀ ਵਾਗ ਡੋਰ ਸੰਭਾਲਣੀ ਹੈ ਤਾਂ ਨੀਲੇ ਘੋੜੇ ਦੇ ਸ਼ਾਹਸਵਾਰ ਦੀ ਮਿਹਰ, ਅਸੀਸ ਤੇ ਬਖਸ਼ਿਸ਼ ਦੀ ਕੋਈ ਉਮੀਦ ਨਹੀਂ ਰੱਖਣੀ ਚਾਹੀਦੀ। ਸਾਰਾ ਰੋਣਾ ਤਾਂ ਇਸ ਗੱਲ ਦਾ ਵੀ ਹੈ ਕਿ ਚੋਟੀ ਦੀ ਸਿੱਖ ਲੀਡਰਸ਼ਿਪ ਦੇ ਸਾਰੇ ਰੁਝੇਵੇਂ ਅੱਜ ਕੱਲ੍ਹ ਇਕ ਸੁਰ ਹੋ ਕੇ ਖ਼ਾਲਸਾ ਚੇਤਨਾ ਨਾਲ ਛਲ ਕਪਟ ਕਰਨ ਵਿੱਚ ਖਰਚ ਹੋ ਰਹੇ ਹਨ।
ਇਕ ਨਿਹੱਥੀ ਤੇ ਪੁਰਅਮਨ ਅਧਿਆਪਕਾ ਉਤੇ ਕਮੀਨੇ ਵਾਰ ਕਰਨ ਵਾਲੇ ਬਲਵਿੰਦਰ ਸਰਪੰਚ ਦੀ ਕਮੀਨਗੀ ਹੁਣ ਯੂ-ਟਿਊਬ ਉਤੇ ਵੀ ਨਸ਼ਰ ਹੋ ਗਈ ਹੈ ਅਤੇ ਇਥੋਂ ਤਕ ਕਿ ਕਬੱਡੀ ਮੈਚ ਦੇ ਉਦਘਾਟਨ ਸਮੇਂ ਅੱਧ ਨੰਗੀਆਂ ਔਰਤਾਂ ਵਿਚ ਨਾਚ ਕਰਨ ਵਾਲੇ ਐਕਟਰ ਸ਼ਾਹਰੁਖ ਖਾਨ ਨੂੰ ਵੀ ਇਹ ਕਹਿਣਾ ਪੈ ਰਿਹਾ ਹੈ ਕਿ ਇਸ ਘਟਨਾ ਨੇ ਸਾਨੂੰ ਮਾਯੂਸ ਕਰ ਕੇ ਰੱਖ ਦਿੱਤਾ ਹੈ। ਅਕਾਲੀ ਲੀਡਰੋ! ਕੁਝ ਤਾਂ ਸੋਚੋ। ਜੇ ਦੁਨੀਆਂਦਾਰੀ ਤ੍ਰਿਸ਼ਨਾ ਤੋਂ ਉੱਚੀ ਸਾਹਿਬ ਕੌਰ ਜਿਸ ਦੀ ਝੋਲੀ ਵਿੱਚ ਦਸ਼ਮੇਸ਼ ਨੇ ਖ਼ਾਲਸਾ ਪੰਥ ਨੂੰ ਪਾਇਆ ਸੀ ਅਤੇ ਜੋ ਸਾਡੀ ਮਾਤਾ ਹੈ ਤੇ ਦਸ਼ਮੇਸ਼ ਗੁਰੂ ਸਾਡੇ ਪਿਤਾ ਹਨ ਤਾਂ ਨਰਿੰਦਰ ਪਾਲ ਕੌਰ ਉਤੇ ਹਮਲਾ ਪੰਥ ਦੀ ਧੀ ਉਤੇ ਹਮਲਾ ਹੈ। ਇਸ ਹਮਲੇ ਦੀ ਰਸਮੀ ਨਿੰਦਾ ਹੀ ਕਾਫ਼ੀ ਨਹੀਂ ਅਤੇ ਨਾ ਹੀ ਉਹ ਸੁੱਕੀ ਸੜੀ ਹਮਦਰਦੀ ਚਾਹੀਦੀ ਹੈ ਜੋ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਨ੍ਹਾਂ ਦੀ ਨੂੰਹ ਹਰਸਿਮਰਤ ਕੌਰ ਬਾਦਲ ਨੇ ਕੁਝ ਇਸ ਅੰਦਾਜ਼ ਵਿਚ ਵਿਖਾਈ ਹੈ ਜਿਵੇਂ ਘਾਗ ਸਿਆਸਤਦਾਨ ਅਕਸਰ ਹੀ ਇਹੋ ਜਿਹੇ ਮੌਕਿਆਂ ‘ਤੇ ਲੋਕਾਚਾਰੀ ਲਈ ਵਿਖਾਉਂਦੇ ਹਨ। ਜੇ ਇਸ ਹਮਦਰਦੀ ਵਿਚ ਥੋੜੀ ਬਹੁਤੀ ਅਪਣੱਤ ਤੇ ਪਛਤਾਵਾ ਵੀ ਹੁੰਦਾ ਤਾਂ ਫਿਰ ਸਵਾਲ ਪੁਛਿਆ ਜਾ ਸਕਦਾ ਹੈ ਕਿ ਗਿੱਦੜਬਾਹਾ ਦੇ ਥਾਣੇਦਾਰ ਨੂੰ ਐਫਆਈਆਰ ਦਰਜ ਕਰਨ ਵਿੱਚ ਕਿਹੜੇ ਲੋਕ ਰੁਕਾਵਟਾਂ ਪਾ ਰਹੇ ਸਨ? ਕੀ ਗੱਲ ਸੀ ਕਿ ਜ਼ਾਲਮ ਤੇ ਦੋਸ਼ੀ ਵਿਅਕਤੀ ਦੇ ਸਿਆਸੀ ਦਬਾਅ ਹੇਠ ਥਾਣੇਦਾਰ ਵੀ ਮਜ਼ਲੂਮ ਵਰਿੰਦਰਪਾਲ ਕੌਰ ਨੂੰ ਰਾਜ਼ੀਨਾਮਾ ਕਰਨ ਦੀ ਸ਼ਰਤ ਰੱਖ ਰਿਹਾ ਸੀ?
ਅਕਾਲ ਤੋਂ ਬੁਰੀ ਤਰ੍ਹਾਂ ਟੁਟ ਚੁਕੇ ਅਤੇ ਸੱਤਾ ਦੇ ਨਸ਼ੇ ਵਿਚ ਡੁਬੇ ਅਕਾਲੀ ਆਗੂਆਂ ਨੂੰ ਇਹ ਚਿਤਾਵਨੀ ਕੌਣ ਦੇਵੇਗਾ ਕਿ ‘ਅਕਾਲ ਪੁਰਖ ਤੋਂ ਡਰ ਕੇ ਰਹੋ। ਉਸ ਦੀ ਸੋਟੀ ਆਵਾਜ਼ ਨਹੀਂ ਕਰਦੀ ਪਰ ਜਦੋਂ ਉਹ ਵੱਜਦੀ ਹੈ ਤਾਂ ਇਸ ਦੀ ਚੋਟ ਦਾ ਕੋਈ ਇਲਾਜ ਨਹੀਂ ਹੁੰਦਾ।’
-ਕਰਮਜੀਤ ਸਿੰਘ (ਫੋਨ : 91-99150-91063)
